Vllaznia-Tirana ishte një ndeshje që nuk duhej humbur nga asnjë prej skuadrave në fushë, por në fund misionin e përmbushin bardheblutë që fitojnë me përmbysje 1-2 në Loro Borici. Golit të shpejtë të Aralicës, kryeqytetasit iu përgjigjën me Ismajlgecin në fundin e pjesës së parë dhe me Hotin në të 70.
Vllaznia tregon edhe njëherë mungesën e të qenit protagonistë në ndeshjet që i duhen, duke rrezikuar tashmë të humbasë edhe vendin e tretë. Të besuarit e Shehit, në anën tjetër, tregojnë karakterin e dytë dhe vendosin një hap të sigurtë drejt titullit kampion, ku asgjë nuk duket se mund ti shqetësojë.
E të mendosh që në Shkodër publiku në Loro Borici u ekzaltua nga goli i Aralicës që në minutën e 7, duke e bërë të mendonin për një fitore të madhe, për renditjen e moralin, duke qenë se pas shpine ndjejnë rrezikun e Partizanit në objektivin Europë. Shkodranët humbën edhe një penallti me Latifin, që goditi shtyllën në minutën e 26. Kryeqytetasit nuk e humbën mendjen dhe arsyetuan, pavarësisht mungesave të rëndësishme në mesfushë, duke u përgjigjur në minutën e 42′ me barazimin e Ismajlgecit.
Një injektim besimi për pjesën e dytë, që 25 herë kampionët e shfrytëzuan, duke kërkuar ta fitonin ndeshjen. Vllaznia shpesh në vështirësi dhe me gabime në ndërtimin e aksioneve u dënua në minutën e 70′ nga Hoti, që zëvendësoi pikërisht Totren e padisponueshëm. Me këtë rezultat, Tirana ngjitet në 56 pikë dhe të paktën për një ditë është +11 nga Laci, ndërsa Vllaznia mund ta shohë veten të kaluar edhe nga Kukësi, në rast se veri lindorët kanë sukses në sfidën me Dinamon.
