Momente paniku në javën e 21 të Bundesligës, në Franz Horr Stadion, ku Austria e Vienës sfidonte Wolfsberger. Pikërisht në minutat e fundit, me vendasit në avantazh 1-0 falë Alexander Grünwald, ndodhi episodi që i tronditi të gjithë. Georg Teigl mori një goditje me gju në kokë dhe u shemb pa ndjenja në tokë. Të gjithë ndalën nën shok, por mbrojtësi i Wolfsberger, Luka Lochoshvili, me shpejtësi u përkul mbi kundërshtarin e tij dhe i dha menjëherë ndihmën e parë. Lojtari futi gishtat në gojën e Teiglit dhe i nxorri gjuhën që mesfushori kishte gëlltitur.
Trajneri i Wolfsberger Robin Dutt ka folur për ngjarjen pas ndeshjes, duke përshkruar momentet e frikës: "Georg Teigl i kafshoi edhe gishtat, por Luka vazhdoi të përpiqej derisa arriti të kapte gjuhën".
Teigl më vonë rifitoi vetëdijen në fushë, por u zëvendësua dhe u transportua në spital për kontrolle të mëtejshme. “Duke parë rrethanat, po shkon mirë. Sigurisht që ai ishte akoma konfuz, por më pyeti nëse fituam”, thotë trajneri i Austrisë së Vjenës, Manfred Schmid.
Lochoshvili, pas ndeshjes, u konsiderua një hero i vërtetë: “Ky ishte veprimi më i rëndësishëm i ditës, të gjithë jemi krenarë për Loçon që veproi me kaq zgjuarsi. Ishte një rezultat i jashtëzakonshëm”, përfundoi Dutt.
Edhe lojtarët kundërshtarë janë entuziazmuar nga gjesti i shkëlqyer i mbrojtësit. Portieri Patrick Pentz ka dashtu ta falënderojë Lochoshvilin: "Ishte me të vërtetë fantastike nga ana e tij, faleminderit për këtë". Po ashtu, golashënuesi Gründwald shtoi: "Sipas mjekut të ekipit tonë, ai mund t'i ketë shpëtuar jetën Georg".
