Inter Media and Communication, shoqëri në të cilën përfshihen të ardhurat nga media dhe sponsorët e klubit zikaltër, ka publikuar një përditësim të dokumenteve mbi rezultatet e gjysmës së dytë të vitit të kaluar, i mbyllur më 31 dhjetor 2021. Në dokument thuhet se si Uefa ka vendosur të hapë një procedim disiplinor në lidhje me Fair Play Financiar kundër Interit, pasi klubi nuk arriti (si shumë të tjerë në Evropë edhe për çështje që lidhen me pandeminë) ekuilibrin në periudhat raportuese 2018, 2019, 2020 dhe 2021. Seanca dëgjimore në lidhje me procesin do të zhvillohet në mars në Nyon, përballë Trupit të Kontrollit Financiar për Klube të UEFA-s.
Sipas Calcio e Finanza, që citon burime pranë UEFA-s, procesi i hapur është i llojit "standard" që nuk synon të sanksionojë klubet, pasi organi më i lartë evropian i futbollit e di se sezonet e fundit, si për Interin ashtu edhe për shumë të tjerë, u vështirësuan edhe më shumë nga kriza ekonomike për shkak të pandemisë.
