“E rëndësishme është që u kualifikuam dhe nuk duhet të shikojmë shumë gabimet. Ndoshta kishim pak fat, por ndoshta fati është i nevojshëm ndonjëherë. Duhet të jemi të kujdesshëm për analizimin e lojtarëve”. Thomas Brdaric, trajneri i Vllaznisë, nuk e fsheh se performanca e skuadrës së tij në cerekfinalen e kthimit linte shumë për të dëshiruar. Edhe pse shkodranët kanë pretendime të mëdha e luanin kundër një skuadre të Kategorisë së Dytë, kuqeblutë vuajtën e madje patën edhe fatin që VAR anulloi golin e avantazhit të vlonjatëve në fundin e pjesës së parë me Oliveiran: “Gjendja e fushës tonë nuk ishte më e mira e mundshme. Do të fokusohemi tek ndeshja e radhës dhe më pas do të analizojmë dhe ndeshjen e sotme kur të jemi më të qetë.”
Tani vëmendja spostohet në kampionat ku përballë do të jetë Teuta, që ka, për fatin e shkodranëve, të njëjtën ngarkesë në këmbë, duke qenë se ka qenë gjithashtu e impenjuar në Kupë: “Përpara përballjes me Laçin kemi pasur një përmirësim të madh dhe atë ndeshje e dominuam pavarësisht se nuk e fituam. Ndeshja me Teutën do të jetë ndryshe sepse kemi tifozët pranë, Duhet të jemi të bashkuar dhe besoj se do dalim mirë”, përfundoi gjermani.
