"Për mendimin tim janë kundërshtarë që të imponojnë respekt, është e favorshme se ke dy ndeshje, nuk është si finale dhe nuk kam preferencë të veçantë". Asnjë preferencë për shortin në gjysëmfinale të Kupës, edhe pse me shumë mundësi Dritan Mehmeti kërkon të shijojë kualifikimin e Partizanit të tij, në derbin me Dinamon të vendosur nga një gol i Skukës. Tekniku megjithatë është kërkues dhe i jep një mesazh të qartë sulmuesit: "Duke pasur parasysh që Suka është një lojtar te i cili kam pasur besim, i kam ndryshuar pozicionin dhe nuk ka bërë asgjë ende, duhet të bëjë më tepër. Ka cilësi të mira për të bërë diferencën, duhet të bëjë më tepër, të sinkronizohet dhe do i rriten vlerat sepse ka cilësi".
Një sqarim edhe për nervozizmin e treguar nga Kallaku në momentin e zëvendësimit. Tekniku Mehmeti mundohet të ulë tensionet dhe të ruajë harmoninë në dhomat e zhveshjes e brenda grupit: "Kallaku është djalë fantastik, e kuptoj edhe unë momentin se e kam ndërruar 2-3 herë dhe kjo është arsyeja që në ato situata nuk e pranon ndërrimin. Por kemi marrëdhënie të shkëlqyer, besojmë te forca e grupit. Kallaku, kur të rritet në aspektin fizik, do të rritet goxha edhe skuadra".
Në lidhje me altruizmin e munguar të Skukës, që kishte rastin të mbyllte ndeshjen, por preferoi të mos shërbente për Junior që do ta kishte portën bosh, Mehmeti sqaroi: "Skuka nuk pasoi? Ai është natyrë shumë pozitive, nuk e bën se nuk do t’ia japë shokut. Ua them me bindje këtë, është natyra e tillë, është lojtar i cili me aftësitë e veta shkon deri atje, duhet të kuptojë dhe do të rritet gradualisht. Kam punuar me të goxha dhe duhet ta kuptojnë edhe shokët që nuk e bën me të keq".
Ish-dinamovit apo i kuq, Mehmeti luan me dy porta: "Unë e kam filluar karrierën si futbollist te Partizani deri 17 vjeç, si trajner kam dalë te Dinamo, kam 5 vite të Partizani. Quajeni si të doni, por rëndësi ka që Partizani po ecën para".
