Shakhtar, fati i pabesueshëm i Alan Patrick: u largua nga Kiev para luftës për një... hernie

Alan Patrick, ditët e fundit në Kiev, ankohej për dhimbje të forta abdominale. Stafi mjekësor i Shakhtarit e kuptoi shpejt se ishte një hernie inguinale dhe organizoi udhëtimin e lojtarit në Gjermani për një operacion. E pikërisht ajo hernie e shpëtoi mesfushorin nga lufta. Lojtarit iu desh të qëndronte në spital për disa ditë para se të kthehej në Kiev. Por brenda pak orësh gjithçka ndryshoi. Rusia nisi operacionin ushtarak në Ukrainë dhe 30-vjeçari vendosi të mos kthehet, por të shkojë në Brazil, te Santos. Vetë Alan Patrick tregon se çfarë ndodhi në një video të postuar në rrjetet sociale. Ish-lojtari i Flamengos ka marrë shumë mesazhe ditët e fundit dhe kështu i ka qetësuar të gjithë duke treguar se tashmë ndodhet në Amerikën e Jugut: “Kam marrë shumë mesazhe ditët e fundit për shkak të situatës në Ukrainë. Shumë njerëz janë të shqetësuar për mua dhe familjen time. Familja ime është mirë, ata janë në Brazil. Sapo kam ardhur në Brazil, edhe unë jam mirë. Nuk isha në gjendje të luaja dhe të stërvitesha për shkak të dhimbjes së barkut. Mjekët dyshuan se ishte një hernie. Caktuam një takim me një specialist në Gjermani dhe u diagnostikua hernia. Gjithçka ndodhi shumë shpejt, por shkoi mirë. Kjo situatë e veçantë përfundoi duke më nxjerrë nga ky moment tensioni që të gjithë brazilianët po përjetojnë atje”.

View this post on Instagram

A post shared by Alan Patrick (@aptrick)

Mesfushori është një nga 13 brazilianët në skuadrën e Shakhtar Donetsk. Që nga fillimi i luftës, lojtarët janë strehuar në një hotel në qendër të Kievit, së bashku me dy bashkatdhetarë të tjerë të Dinamos. Futbollistët i kërkuan qeverisë braziliane ndihmë për t'u larguar nga vendi i Evropës Lindore. 30-vjeçari nuk i harron miqtë e tij që janë ende në Ukrainë: “Është një përzierje ndjenjash. Është lehtësim të jem në shtëpi me familjen time, por zemra ime është shumë afër dhe e pikëlluar përballë kësaj situate ku ndodhen miqtë, shokët e skuadrës, të cilët janë edhe familja ime. Shpresoj që Zoti të kujdeset për gjithçka dhe që ata të gjejnë zgjidhje për të dalë sa më shpejt prej saj. Kam besim në lutjet dhe mbështetjen e të gjithëve. Uroj që autoritetet braziliane të gjejnë një zgjidhje sa më shpejt të jetë e mundur për të larguar brazilianët nga atje. Paqe për botën, lutje për Ukrainën. Në emër të Jezusit e gjithë kjo do të kalojë”.