Nga Korça Partizani doli me tre pikë, duke i dhënë frymëmarrje vrapimit me pengesa drejt zonës europiane të renditjes, por nëse e arriti këtë merita është e Xhuljano Skukës. Sulmuesi dibran me dygolëshin kundër Skënderbeut konfirmoi veten si fytyra e re e Partizanit e kjo jo në këndvështrimin e imazhit, por atë transformim taktik, intuitiv e agonistik që ardhja e 23 vjecarit i ka bërë skuadrës së Mehmetit. Tekniku e njihte që në kohët e Korabit, kur djaloshi erdhi nga eksperienca e moshave në Francë, ndoshta edhe sepse e dinte mirë cfarë do ti ofronte e kërkoi atëherë kur shifrat tregonin të kundërtën.
Me Dinamon në 13 ndeshje qendërsulmuesi e dërgoi topin vetëm një herë në rrjetë, ndërsa tani gjërat janë ndryshe, meritë edhe e mënyrës së përdorimit të tij nga trajneri i Partizanit. Katër ndeshje me fanellën e kuqe, që nga transferimi i tij e pesë gola, rendiment që përmirësohet nëse merren vetëm tre ndeshjet radhazi në të cilat ai ka shkuar në gol. Ndërsa nëse llogariten minutat Skuka ka bërë edhe më mirë: ka shënuar gol cdo 71 minuta. Sulmuesi po tërheq Partizanin duke lënë shenjën e tij vendimtare, pasi eleminoi pikërisht Dinamon që nuk besoi tek ai, me golin vendimtar në cerekfinalen e kthimit të Kupës së Shqipërisë, tani ai përmbysi korcarët me vetëm 45 minuta në fushë e madje me injeksione për të përballuar dhimbjen e kaviljes së dëmtuar.
E tani Mehmeti pyet veten vetëm se, nëse për gjysëm loje dhe i dëmtuar Skuka bën këtë, cfarë mund ti japë Partizanit me minutazhin e potencialin e plotë…?
