Një lajm që qarkullonte, por sot në daljen e parë të vitit të Partizanit në stërvitje ka marrë zyrtarizimin. Dritan Mehmeti do të jetë trajneri i të kuqve, me detyrën për të udhëhequr skuadrën deri në fund të kampionatit. Lajmi është konfirmuar nga postimi në faqen zyrtare të klubit ku thuhet se "me fillimin e vitit të ri 2022 ekipi ka nisur zyrtarisht përgatitjet në drejtimin e Dritan Mehmetit".
Pas largimit konsensual të Ilir Dajës nga pankina kryeqytetase, drejtuesit e klubit kanë menduar për një zgjedhje loë-coast, duke i besuar drejtimin e Partizanit një njohje të vjetër të skuadrës, pjesë e familjes së kuqe nga sezoni 2018 - 19, sezon në të cilin u shpall edhe kampion i Shqipërisë në detyrën e asistentit të Skënder Gegës. Mehmeti ka drejtuar më parë Partizanin B dhe nga ky sezon ishte në krye të ekipit U-21, por renditja e komplikuar me të kuqtë pothuaj jashtë cdo objektivi, kanë bërë që drejtuesit të mendojnë për një zgjidhje pa shpenzime të mëdha e që nuk do të jetë nën presion objektivash.
Nëse do të mbërrijë (duke parë se ka shumë ndeshje përpara) një pozicionim në zonën Europiane të renditjes, atëherë më mirë akoma, por idea është që në verë gjërat të ndryshojnë në mënyrë radikale te Partizani që, nën drejtimin e trajnerit Mehmeti, sot ka zhvilluar seancën e parë në orën 11:30 në ambientet e kompleksit sportiv "Fooball Republic" për takimin ndaj Egnatias.
