Ish-kryeministri dhe ish-kryetari i Partisë Demokratike Sali Berisha u ka kthyer përgjigje zërave për një rikthim në krye të partisë. Qartësisht e artikuloi këtë kërkesë Arben Imami para pak ditësh, por Berisha thotë se nuk do të marrë asnjë rol të tillë.
“Unë nuk jam i gatshëm të marr asnjë rol, përveç këtij roli që kam. Jam njeri i tërhequr dhe i dorëhequr. Unë besoj se ky grup, të gjithë, këta ish-drejtues, Basha dhe drejtuesit e tjerë aktualë, i kanë të gjitha mundësitë dhe pontencialet, që në interesin më të mirë të Shqipërisë e shoqërisë shqiptare, por edhe miqtë e PD janë thellësisht të interesuar që PD të konsolidohet në të gjitha kontributet e veta, të gjejnë rrugën dhe vazhdojnë betejën, pasi askush nuk mund të thotë sot, se Shqipëria ka pasur ndonjë rrezik më të madh në këto 27 vite se narkoshtetin e Edi Ramës” – thotë Berisha në një intervistë për Fax News.
Por nëse bashkimi të gjitha rrymave nuk ndodh a rrezikon PD përçarjen?
“Unë besoj se nuk do të dështojë bashkimi. Nuk është një proces i lehtë, por uroj dhe dëshiroj që secili të marrë përgjegjësinë e tij dhe në interesin më të mirë duke pasur përballë një situatë të vështirë. Theksoj se kontributet duhet të bashkohen dhe duhet të bëhet një përpjekje shumë e madhe për të elektrizuar rininë shqiptare, angazhuar atë në një betejë si rruga e vetme për të përmbysur këtë klikë në pushtet, e cila pa revolucion nuk ikën” – thotë Berisha.
Sipas tij disa hapa janë hedhur, por shton se bashkimi duhet për përfshijë të gjitha kontributet.
