Shqipëria siguroi tri pikë të rëndësishme në Ligën e Kombeve, Liga C, pas fitores 2-0 ndaj Finlandës në stadiumin “Air Albania”. Pas ndeshjes, trajneri Rolando Maran analizoi paraqitjen e kuqezinjve, duke vlerësuar fleksibilitetin taktik, por edhe duke evidentuar një problem që kërkon zgjidhje.
Maran vlerëson fleksibilitetin taktik
Tekniku italian theksoi se skuadra nuk duhet të kufizohet në një formacion të vetëm, por të përshtatet sipas kundërshtarit. Ai veçoi paraqitjet e Pilos, Hysajt dhe Mitajt, ky i fundit në një rol jo të zakonshëm.
“Nuk është fokusi vetëm te një formacion fiks, por edhe te fleksibiliteti, në varësi të karakteristikave të kundërshtarit. Nuk është vetëm Pilo, edhe Hysaj ka bërë shumë mirë, apo Mitaj, që nuk ka rolin e tij të zakonshëm, por po bën shumë mirë. Pra, kemi lojtarë të ndryshëm që kanë zhvilluar paraqitje të nivelit të lartë”, u shpreh Maran.
Paralajmërimi për rënien e ritmit
Pavarësisht fitores, trajneri kërkoi më shumë vazhdimësi gjatë gjithë ndeshjes. Ai u ndal te 10-15 minutat e fundit, kur Shqipëria uli intensitetin dhe e pati më të vështirë të kontrollonte lojën.
“Nuk duhet t’ia lejojmë vetes të ulim ritmin. Kur e bëjmë këtë, e kemi të vështirë, siç ndodhi edhe sot në 10-15 minutat e fundit. Ishte një ndeshje e ekuilibruar. Kemi prekur shumë topa në zonën kundërshtare”, deklaroi trajneri.
Muçi dhe rëndësia e golit
Maran komentoi edhe realizimin e Muçit, duke vënë në dukje se sulmuesi ka cilësi për të shënuar gola të tillë dhe se ky moment mund t'i japë besimin e nevojshëm.
“Shikoj gjithmonë rëndësinë e golit. Muçi i ka tipikë gola të tillë. Ndoshta ka pasur nevojë për një shtysë të tillë”, përfundoi Maran.
