Socialistët do të mbajnë këtë të shtunën asamblenë në një resort në Gjirin e Lalzit. Mes çështjeve që pritet të marrin vëmendje janë jo vetëm protesta, lufta Rama-Veliaj, por edhe zgjedhjet lokale të 9 majit. Beteja për Tiranën është ajo që do të shenjojë garën elektorale teksa socialistët nuk e kanë ende një kandidat të deklaruar.
Burime të mirëinformuara të Lapsi.al pranë mazhorancës thanë se kanë nisur sondazhet e brendshme për disa emra të mundshëm që do t’i prijnë garës për Tiranën.
Mes tyre është edhe Ervin Demo, Ministri i Punëve të Brendshme. Por siç tregoi më tej burimi ynë që kishte mësuar të dhënat e sondazhit, Demo ishte larg pritshmërive të Edi Ramës, aq sa për t’i besuar nominimin për Tiranën. Madje tha burimi ynë, ai vlerësohej nën mesataren që ishin kuotuar disa emra të tjerë të sonduar për përdorim të brendshëm nga PS.
Demo erdhi në krye të Ministrisë së Punëve të Brendshme dy muaj më parë dhe menjëherë nisi të shfaqej në kryeqytet për çështje që ishin pa lidhje me fushën e tij të përgjegjësisë, si për shembull rindërtimi në Tiranë.
Por turravrapin e tij e ndali protesta. Edhe pse gati u zhduk publikisht, Demo dhe Skndër Hita përcillnin porositë e Edi Ramës për të shtypur dhunshëm protestën në rrugët e Tiranës.
Nga gara për Tiranën duket se ka dalë edhe Ogerta Manastirliu ndonëse edhe emri i saj është hedhur në sondazhe të brendshme. Tashmë Manastirliu ka probleme të hapura me SPAK-un, sidomos pasi iu sekuestrua celulari bashkëshortit të saj.
Një emër tjetër i mundshëm në garën për Tiranën është Albana Koçiu, zv.kryeministrja dhe dikur një bashkëpunëtore e ngushtë e Ramës në Bashkinë Tiranë.
Sic tregoi burimi për Lapsi.al edhe ajo është kuotuar keq në një sondim të kohëve të fundit. Duket se problemi real i Edi Ramës në këto zgjedhje më shumë sesa kandidatët është vetë PS-ja dhe kryeministri, me modelin e qeverisjes dhe administrimit të pushtetit.
Ndonëse e avantazhuar në letër, beteja e 9 majit për Tiranën është me siguri më e vështira që socialistët kanë zhvilluar ndonjëherë pas asaj të 2011 kur Edi Rama humbi bashkinë pas 12 vitesh. ©LAPSI.al
