Policia e Vlorës ka finalizuar operacionin e koduar “Strike 8”, në kuadër të të cilit është kapur dhe arrestuar një 64-vjeçar i shpallur në kërkim ndërkombëtar nga Interpol Roma. Në pranga ka rënë shtetasi Azis Balla banues në Tiranë, i cili u lokalizua në lagjen “Hajro Çakërri” në Vlorë. Arrestimi u krye me qëllim ekstradimin e tij drejt Italisë.
Sipas Policisë, 64-vjeçari ishte dënuar nga Gjykata e Apelit e Peruxhias në Itali me 4 vite burgim, për veprën penale “Marrëdhënia seksuale me dhunë”. Operacioni u organizua nga Seksioni për Mbështetjen Operacionale të Hetimit, bazuar në informacionet e siguruara në rrugë operative për vendndodhjen e personit të kërkuar. Ndërkohë, Interpol Tirana, në bashkëpunim me homologët italianë, po vijon procedurat për ekstradimin e tij drejt Italisë.
