Autoritetet greke kanë ekstraduar drejt Turqisë Sercan Sayal, i dyshuar si drejtues i një organizate kriminale dhe i kërkuar ndërkombëtarisht me një njoftim të kuq të Interpolit. Ai kërkohej për 116 vepra penale, mes tyre vrasje me dashje, grabitje të armatosura dhe krijim të një organizate kriminale.
Sipas raportimeve nga mediat e huaja, Sayal dyshohet se ka lidhje me 90 sulme me armë zjarri, tre sulme që kanë shkaktuar plagosje, një vrasje dhe 164 raste kërcënimesh në qytetin e Izmirit. Ai konsiderohet nga autoritetet si drejtues i një organizate kriminale të ashtuquajtur të “gjeneratës së re”. Operacioni për ekstradimin e tij u zhvillua në bashkëpunim mes strukturave policore, shërbimeve të inteligjencës dhe autoriteteve të Interpolit në të dy vendet.
Pas mbërritjes në Turqi, Sayal do të përballet me procedurat përkatëse gjyqësore. Ministri i Brendshëm turk, Mustafa Çiftçi, deklaroi se operacionet për kapjen dhe kthimin e personave të kërkuar jashtë vendit do të vijojnë. Sipas të dhënave të bëra publike prej tij, që nga fillimi i vitit Turqia ka rikthyer në vend 805 persona të kërkuar nga 45 shtete, mes tyre 189 drejtues ose anëtarë të grupeve kriminale.
