Pas largimit të Brdaric duket se edhe Vllaznia është shthurur. Debutimi i Elvis Plorit në pankinën shkodrane ka shkuar si mos më keq, i dënuar nga një trigolësh i Pedro Augustos, që i dha fitoren 3-0 Egnatias, duke e udhëhequr drejt shpëtimit.
Shkodranët marrin humbjen e dytë radhazi në kampionat, të dominuar
gjatë gjithë lojës, por sidomos pjesës së parë, me rrogozhinasit që shpërdoruan raste pafund. Në minutën e 31 Pedro Augusto kaloi në avantazh rrogozhinasit, duke i shpëtuar pozicionit jashtë loje. Problem edhe njëherë bëhet VAR, me një vendim që merr shumë kohë: u deshën në fakt, rreth 5 minuta në monitorin e VAR që arbitri të konfirmonte golin.
Lëvizjet e Plorit në pjesën e dytë e bënë Vllazninë të ishte më në ekuilibër dhe shkodranët shkuan pranë barazimit në tre moment, të ndalur nga portieri Puja. Pikërisht në momentin më të mirë të tyre kuqeblutë mbetën me 10 lojtarë, pasi Heriç u ndëshkua me karton të kuq (i dyti i verdhë), duke e lënë skuadrën në inferioritet.
Aty përfituan të besuarit e Ramadanit që vulosën fitoren me një dygolësh tjetër të Pedro Augustos. Braziliani shënoi golin e dytë në minutën e 78 dhe u përsërit në minutën e 87’ kur fiksoi tregolëshin e parë në Superiore. Me këtë triumf Egnatia mbetet në vendin e 8 me 27 pikë të grumbulluara, ndërsa Vllaznia në vendin e 4 me 39 pikë.
