Steven Bradbury është përsëri një hero, por kësaj radhe "arritja" e tij vlen më shumë se një medalje e artë. Australiani, fitues i pabesueshëm i medaljes së artë olimpike në Salt Lake City 2002, në 'short track', i ka shpëtuar jetën katër vajzave që po mbyteshin në det dhe ishin në mëshirën e dallgëve.
48-vjeçari, i cili ndodhej në plazhin e Queensland për të bërë sërf, bashkë me të birin, ka vënë re vajzat e reja në vështirësi dhe menjëherë ka nxituar për t'i shpëtuar, pavarësisht dallgëve të larta. Të gjitha shpëtuan shëndoshë e mirë, pavarësisht se njëra prej vajzave kaloi në hiperventilim. Të rejat më pas deklaruan se pa ndihmën e Bradburyt nuk do t'ia dilnin dot kurrë.
