Juventusi mposhti 1-0 Spezian në javën e 28 të Serie A dhe konsolidoi vendin e katërt, duke u ngjitur në +6 ndaj Atalantës dhe Romës. Për bardhezinjtë mjaftoi goli i Moratas në minutën e 21, i favorizuar nga një rivënie e topit në lojë e gabuar nga Provedel, për të kaluar skuadrën e Thiago Mottas, e cila luajti një pjesë të dytë pozitive por pa krijuar shqetësime të mëdha te Szczesny. Një Manaj krejtësisht në hijë nuk mundi të bëjë asgjë përballë mbrojtjes solide të Allegrit dhe për lojtarin shqiptar zëvendësimi në minutën e 76 ishte i pritshëm. Ligurët ruajnë një diferencë prej 4 pikësh nga zona e rënies.
Edhe një herë shfaqet Juventusi tipik i Allegrit. Cinik, aspak i bukur për t'u parë, por jashtëzakonisht efektiv kur bëhet fjalë për arritjen e rezultateve. Bardhezinjtë e kompensojnë mbrëmjen nën ton të Vlahovic me një gol të Moratas dhe një fazë të shkëlqyer mbrojtëse, falë së cilës i rezistuan sulmeve të Spezias në një pjesë të dytë me vuajtje të mëdha. Skuadra torineze duket se do të vazhdojë të vrapojë drejt objektivit të saj dhe ndaj ligurëve vuri në pah mungesën kronike të cilësisë dhe fantazisë në mesfushë. Duke patur parasysh edhe mungesat e shumta të kësaj periudhe, megjithatë, bardhezinjtë sërish arritën të marrin për të disatën herë rezultatin maksimal me përpjekjen minimale.
