Goli në transfertë nuk do të vlejë më dyfish as në Kupën e Italisë, por vetëm duke filluar nga sezoni i ardhshëm. Kështu ka vendosur mbledhja e Këshillit të Ligës në Itali. Dy ndeshjet e fundit që do të luhen me rregullin që, goli në transfertë vlen më shumë se ai në shtëpi, do të jenë gjysmëfinalet Milan-Inter dhe Fiorentina-Juventus (ndeshjet e para janë planifikuar për 1 dhe 2 mars).
Siç parashikohej, Këshilli i Ligës ka standardizuar kështu atë që u vendos nga UEFA për kupat evropiane: golat e shënuar në shtëpi dhe në transfertë në ndeshjet e Champions, Europa League dhe Conference League kanë të njëjtën vlerë, pasi u hoq dorë nga rregulli që ishte në fuqi që nga viti 1965.
