Kur po bëhet gati të luhet java e 20 e kampionatit, cdo hap fals mund të kushtojë dhe këtë fakt e ka të qartë si Tirana kryesuese ashtu edhe ndjekësit e saj, me Laçin që, në këtë rast, rrezikon më tepër se të gjithë në transfertën e kryeqytetit. Kukësi kërkon të shfrytëzojë javën e 20, që për shkak të mesjavës së Kupës është spostuar të dielën e të hënën, për tiu kthyer vendit të dytë, duke parë impenjimin e vështirë të kurbinasve, që kanë tre pikë më shumë në renditje, 37. Skuadra e Longos është e përqendruar vetëm në kampionat, por nuk mund ta quajë të kaluar pengesën Kastrioti, që vërtetë është i fundit, por me Çelën në pankinë po bën rezultate befasuese.
Vllaznia e Teuta ndahen nga 9 pikë mes tyre, por shkodranët nuk duan të humbasin trenin Europë të kampionatit, duke qenë se në gjysëmfinalet e Kupës gjithcka mund të ndodhë. Kështu, për Brdaric, që ndjen presionin e Partizanit rezultati është shumë më i rëndësishëm se për të besuarit e Arapit, që kërkojnë të rikthejnë lojën në skuadër me sytë pikërisht nga Kupa.
Dinamo është në pozita të vështira, jo vetëm për eleminimin në cerekfinale, por edhe sepse renditja e vë në alarm të përfshirjes në mbijetesë. Kështu, kundër Lacit kërkohet rezultat, me Devollin që debutoi me humbje e nuk dëshiron ti bëjë dy radhazi, në kohën kur përplaset me skuadrën e momentit, por që rrezikon të vuajë sfilitjen e 120 plus penalltive të ndeshjes me Egnatian në Kupë.
Çdo fije shpresë për të shpëtuar sezonin duhet shfrytëzuar edhe nga Partizani, që pasi siguroi katër më të mirat e Kupës kërkon të vihet në ndjekje të vendit të katërt, për momentin 5 pikë larg. Në ndeshjen me të kuqtë, Skënderbeu vjen me tërbimin e eleminimit me polemika nga Teuta dhe me vetëm golavarazhin që e mban mbi zonën e rënies, pikët janë emergjente, për më tepër që luhet në Korcë.
E fundit për javën, zbret në fushë Tirana kryesuese, që do të ketë favorin të njohë rezultatet, përpara se të luajë me Egnatian. Rrogozhinasit janë një kockë e fortë, por vijnë nga lodhja e Kupës, ndërsa bardheblutë kanë shansin më të mirë për të shtuar diferencën me ndjekësit, gjithnjë nëse një dorë ia jep edhe Dinamo…
SUPERIORE, JAVA 20
13/02/22
Kukësi 13 : 45 Kastrioti
Vllaznia 16 : 45 Teuta
14/02/22
Dinamo 16 : 45 Laçi
Skënderbeu 16 : 45 Partizani
Tirana 19 : 45 Egnatia
