"Derbi? Skuadra nuk reshti së besuari, më pas episodet vendosën një ndeshje shumë më të ekuilibruar nga sa u tha". Kështu u shpreh Stefano Pioli, trajneri i Milanit, në mikrofonat e Radio Anch'Io Sport në Radio1, duke iu gëzuar ende fitores ndaj Interit: “Rinovimi im? Jam mirë këtu, kam një marrëdhënie të shkëlqyer me klubin dhe drejtuesit. Jemi në harmoni të plotë, sot do të thosha se mund të qëndroja këtu përgjithmonë, pastaj dihet që futbolli është plot dinamika”. Trajneri iu rikthye edhe episodit nga i cili lindi goli i parë i Giroud, i kontestuar nga Interi: "Është arbitri ai që vendos se si të interpretojë faullet, pastaj lojtarët duhet të përshtaten. Në Evropë disa gjysëmfaulle nuk fishkëllehen dhe lojtarët nuk mund të ndalen dhe të protestojnë. Unë nuk jam që të fishkëllehen gjysëmfaullet, sepse futbolli është një lojë kontakti."
"Tani duhet të përfitojmë nga ky rezultat për të pasur edhe më shumë entuziazëm dhe bindje. Në Itali çdo ndeshje është e vështirë, sidomos në fazën e dytë. Tani do të përballemi me Sampdorian, na duhet një paraqitje e nivelit të lartë. Së pari, megjithatë, është Kupa e Italisë me Lacion, një nga skuadrat më cilësore në sulm”, shtoi Pioli, i cili absolutisht nuk dëshiron të ulë tensionin dhe largon fjalën titull: “Klasifikimi nuk është akoma i plotë, janë ndeshjet për tu rikuperuar. Të pesë të parat po luftojnë për gjithçka, titullin dhe Champions. Pesëmbëdhjetë ndeshje dhe 45 pikë në dispozicion janë shumë. Ka ekuilibër të madh dhe ne duhet të shtyjmë fort, unë ende mendoj se Interi dhe Juventus janë skuadrat më të forta."
"Ibra? Sezoni është ende i gjatë, tani për tani ai është ndalur, por mbetet një burim i rëndësishëm për ne. Ai është i qetë, po bën gjithçka për t'u rikthyer dhe do të shohim. Ai kurrë nuk do të jetë një barrë, por një burim shumë i rëndësishëm. Po ndihmon skuadrën të rritet shumë" përfundoi tekniku kuqezi.
