Nuk ka rëndësi nëse luan për mbijetesë, për kampion, apo sa pikë i ndajnë dy skuadrat: ajo që tifozët nuk falin është humbja në derbi. E takimi është programuar dy ditë para Krishtlindjes, me Tiranën që vjen si kryesuese e kampionatit e me Partizanin në krizë rezultatesh dhe pa stabilitet në këtë sezon në Superiore. Hegjemonia 6 vjecare e kohës së artë të të kuqve është tani vetëm një kujtim i zbehtë, por bardheblutë duhet të luajnë kundër rivalit të përjetshëm e kundër statistikave, që të marra në histori e kanë ngjyer të kuq kryeqytetin.
Ajo në Arena Kombëtare është përplasja kryeqytetase numër 163 në të gjitha kompeticionet mes dy klubeve që janë rivalë, armiq, të urryer, por gjithë të respektuar. Të kuqtë kanë në favor 66 fitore dhe 51 barazime, duke i lënë 45 suksese kundërshtarit, shifra që natyrisht Tirana kërkon ti përmirësojë. Në këtë mënyrë të të ndërtuarit të historisë edhe golavarazhi sigurisht që do të ishte në favor të Partizanit 227-173, për më tepër që Tirana ka fituar vetëm 10 herë në 41 përballjet e fundit me të kuqtë. Statistikat megjithatë nuk do të zbresin në fushë sonte, aty ku 25 herë kampionët janë kryesuesit e kampionatit me një moral të jashtëzakonshëm pasi kanë mposhtur Teutën trofembajtëse, me rikthimin në fushë të Xhixhës, që në derbi do të jetë më shumë se gati.
E kundërta ndodh me të kuqtë, që kanë dy humbje në tre ndeshjet e fundit dhe për Europën duhet të bëjnë kthesën në ndeshjen më delikate. Duke ditur ngarkesën emocionale të një ndërqytetase e duke patur parasysh precedentët, si Tirana ashtu dhe Partizani kanë shanse të barabarta për të fituar, por si Daja ashtu dhe Shehi kanë të njëjtën dëshirë për të shprehur poshtë pemës së Krishtlindjes.
