Lushkja e hap dhe mbyll fitoren e fundit të 2021 për Lacin, që kompleton një fazë të plotë loje nga Kastrioti te Kastrioti me 7 fitore, një barazim e vetëm një humbje. 2-0 imponohen kurbinasit në shtëpi përballë krutanëve 'jetim' edhe nga trajneri Ramadan Ndreu i dënuar nga Disiplina me 12 javë pezullim, pas goditjes me shkelm ndaj Vitijas në sfidën kundër Skënderbeut. Fitorja e pestë radhazi e bardhezinjve, që tani presin të qetë ndonjë favor në përplasjet e rivalëve direkt.
Regi Lushkja ishte protagonisti absolut me golin e shpejtë të minutës së 9′, që i dha avantazhin skuadrës së Mirel Josës, me një goditje nga jashtë zone. Mesfushori e bëri shumë më të lehtë për bardhezinjtë pjesën tjetër të ndeshjes, me Kastriotin asnjëherë i rrezikshëm, ndërsa Laci u mjaftua të kontrollojë, për të goditur në momentin e duhur. Mund ta kishte bërë 5 minuta nga fundi i pjesës së parë kur Lushkja realizoi përsëri, por këtë herë Guindo ishte në pozicion jashtë loje dhe goli nuk vlente. Do të kishte qenë tregolëshi i mundshëm, sepse mesfushori kompletoi ndeshjen e tij perfekte në pjesën e dytë.
Kastrioti tentoi të bënte dicka më shumë në pjesën e dytë, duke marrë kontrollin e lojës, por pikërisht në momentin ku krutanët ishin duke shpresuar të ndërtonin situata të rrezikshme për të barazuar rezultatin, erdhi goditja e Lushkjas, që dyfishoi shifrat pas një kundërsulmi perfekt, duke siguruar fitoren për Laçin, që tani është i dyti, duke grumbulluar 27 pikë, ndërsa Kastrioti renditet e fundit në kuotën e 8 pikëve.
