“Kjo ishte ndeshja më e vështirë që kemi luajtur në këto pesë sfida radhazi. Fitorja ishte më e rëndësishme për mua edhe pse Kastrioti ka luajtur si e barabartë me Skënderbeun". Mirel Josa merr frymë lehtësisht pasi kompletoi detyrën për ta mbyllur 2021 e futbollit me pesë fitore radhazi. Tekniku tani shpreson në gabimet e atyre që janë para në renditje, ndërsa shpjegon cfarë e bëri skuadrën e tij të ishte nën ritmin e zakonshëm: "Ndikoi lodhja te ekipi im, goli i parë na vuri disi në gjumë, ne duhet të bënim më mirë që të kalonim mbrojtjen e Kastriotit. Zëvendësimet duhet ti bësh në balancë me atë që çfarë kërkon në fushë".
Tani, loja spostohet në merkato, aty ku mund të vijnë lojtarë që të bëjnë menjëherë diferencën, ose të paktën, kjo është ajo që shpreson tekniku: "Nuk mund të them që ekipit nuk i duhet lojtarë, na duhen lojtarë që ta ndihmojnë skuadrën në mënyrë të menjëhershme. Presidenti më ka thënë që mund të bëjmë dy-tre lëvizje. Duhet që të marrim lojtarë që janë aktiv në skuadrat e tyre, si në kampionatin tonë, por edhe jashtë shtetit".
Në fund, një koment mbi dy sulmuesit e Lacit, një prej të cilëve Harmon, vazhdon të mos gjejë hapësira, i mbyllur nga një Guindo që me 8 gola po rivalizon me Seferin për titullin e golashënuesit. "Harmon Van Dejvin e kam pasur një nga lojtarët që më ka pëlqyer që përpara se të vija këtu. Por në momentin që ekipi ka këtë vendosje dhe Guindo po bën shumë mirë, është çështje tjetër, ai ka pasur edhe një dëmtim. Ai është pjestar i skuadrës, njeri me detyrim nuk mbahet në skuadër”, përfundoi tekniku i bardhezinjve.
