Gjykata e Fierit ka dhënë masën e sigurisë për një nga autorët që mbeti i plagosur nga policia gjatë tentativës për të grabitur në një banesë në Fier.
Gjykata ka dhënë masën ‘arrest në burg’ në mungesë për Arben Mucën, i cili ndodhet në spitalin e Fierit. Ai u përfaqësua nga avokati Ardjan Abazi, i cili tha se klienti ti tij nuk mbante mend asgjë.
“Nuk mbaj mend gjë, jam i shokuar” - ka thënë 37-vjecari Arben Muca.
Ngjarja ndodhi para disa ditësh në lagjen “29 Nëntori” në Fier, ku 4 persona të armatosur dhe me maska tentuan të grabisnin në banesën e Minella Muces.
Çifti Muça pikasi grabitësit që tentuan të hapnin derën dhe menjëherë kanë njoftuar policinë e cila mbërriti në vendngjarje. Gjatë aksionit për kapjen e grabitësve, këta të fundit qëlluan mbi policinë e cila u kundërpërgjigj duke vrarë Xhuliano Sollakun dhe duke plagosur Arben Mucën. Ndërkohë dy bashkëpunëtorët e tjerë arritën të largohen dhe janë shpallur në kërkim.
