Këngëtarja e njohur Ariana Grande ka reflektuar sërish mbi ndikimin e ish-partnerit të saj të ndjerë, Mac Miller, në muzikën dhe jetën e saj.
Gjatë një MasterClass-i të organizuar nga The Hollywood Reporter në Universitetin Chapman në Kaliforni, Grande foli hapur për rolin që reperi kishte luajtur në formimin e stilit të saj muzikor.
Grande u shpreh se ishte "shumë mirënjohëse" për Miller, i cili e kishte inkurajuar të “bëjë hapin e guximshëm” dhe të eksplorojë tingujt R&B në muzikën pop.
Ajo tregoi se pikërisht kjo arsye e bëri atë “të paduruar” për ta ftuar Miller në bashkëpunimin e tyre të vitit 2013, këngën e suksesshme “The Way”.
“Jo vetëm sepse ai ishte perfekt për këngën, por edhe sepse ndihesha sikur i detyrohesha atij për gjetjen e tingullit tim,” – tha këngëtarja.
Dyshja bashkëpunoi sërish në vitin 2016 me hitin “My Favorite Part”, si edhe në remix e këngës së saj “Into You”.
Grande dhe Miller konfirmuan lidhjen e tyre në vitin 2016 dhe qëndruan bashkë për gati dy vite, derisa u ndanë në maj të vitit 2018.
Vetëm katër muaj pas ndarjes, më 7 shtator 2018, Mac Miller humbi jetën nga një mbidozë aksidentale, në moshën 26-vjeçare.
Grande e përjetoi rëndë humbjen dhe publikoi një dedikim emocionues, ku shkruante:
“Të kam adhuruar që nga dita që të takova kur isha 19 vjeçe dhe do të të dua gjithmonë… Jam e zemëruar, e pikëlluar, dhe nuk di çfarë të bëj.”
Ajo shprehu pendesën që nuk kishte mundur ta ndihmonte në betejën e tij me problemet personale:
“Doja aq shumë të të ndihmoja… Ti ishe shpirti më i butë e më i mirë, me demonë që nuk i meritoje.”
