Matthew Lillard nuk e ka pritur mirë faktin që Quentin Tarantino e ka përmendur negativisht në një intervistë të fundit.
Gjatë një paneli në GalaxyCon Columbus, aktori i “Scream”, 55 vjeç, reagoi ndaj deklaratës virale të Tarantinos në podcastin “The Bret Easton Ellis Podcast”, ku regjisori tha hapur: “Nuk e pëlqej Matthew Lillard.”
“Eh, s’ka gjë. Kush e vret mendjen?” – u shpreh ai me humor. Megjithatë, aktori pranoi se fjalët e Tarantinos e kanë prekur.
“Të dhemb. Është e shpifur,” tha ai.“Dhe një gjë të tillë nuk do t’ia thoshit Tom Cruise-it apo ndonjë aktori të listës A.”
Lillard shtoi se megjithëse është shumë i dashur për fansat, nuk është po aq i vlerësuar në Hollywood:
“Jam shumë popullor në këtë sallë, por jo edhe aq në Hollywood. Janë dy botë të ndryshme.”
Në episodin e 2 dhjetorit të podcastit, Tarantino nuk u ndal vetëm te Lillard. Ai tha se nuk e pëlqen as Owen Wilson, ndërsa kritikat më të ashpra i rezervoi për Paul Dano, duke e quajtur “aktor të dobët” në filmin “There Will Be Blood.”
Tarantino madje shtoi se Daniel Day-Lewis e tejkalon aq shumë, saqë filmi “nuk ka fare dyshen e fortë që duhej të kishte.”
Deklaratat e tij u pritën me reagime të menjëhershme nga aktorë të njohur. Ben Stiller shkroi në X: “Paul Dano është thjesht brilant.” Edhe Simu Liu dhe regjisori i “The Batman”, Matt Reeves, e mbrojtën fuqishëm aktorin.
