Filmi “Sinners”, me Michael B. Jordan në dy role, kryeson nominimet e këtij viti në Critics Choice Awards me 17 kandidime, duke u bërë projekti më i përmendur i edicionit të 31-të. Aktori i njohur interpreton binjakët Smoke dhe Stack në filmin me temë vampirësh, i cili ka bërë bujë që nga publikimi.
Në garën e filmit, pas “Sinners” renditet “One Battle After Another” me 14 nominime, ndërsa “Hamnet” dhe “Frankenstein” grumbulluan nga 11 kandidime secili.
Edhe Timothée Chalamet shënoi sukses këtë vit, pasi filmi i tij “Marty Supreme” u nominua në 8 kategori.
Në kategoritë televizive, seriali i Netflix “Adolescence” kryeson me 6 nominime, duke u ndjekur nga seritë “Nobody Wants This”, “All Her Fault”, “Hacks”, “Ghosts”, “Severance” dhe “The Diplomat”.
Ceremonia do të mbahet më 4 janar 2026 në Santa Monica, me Chelsea Handler si prezantuese.
Disa surpriza të mëdha këtë vit përfshijnë mungesën e Cynthia Erivo nga gara e aktores më të mirë për “Wicked: For Good”, si dhe faktin që Netflix-i “Wake Up Dead Man: A Knives Out Mystery” nuk mori asnjë nominim. Po ashtu, “Avatar: Fire and Ash” zhgënjeu, duke marrë vetëm një nominim, për efektet vizuale.
Në vijim, disa nga nominimet kryesore për film:
- Filmi më i mirë: Sinners, Hamnet, Frankenstein, Bugonia, One Battle After Another etj.
- Aktori më i mirë: Michael B. Jordan, Leonardo DiCaprio, Timothée Chalamet etj.
- Aktorja më e mirë: Emma Stone, Amanda Seyfried, Jessie Buckley etj.
Ndërsa për televizion:
- Drama më e mirë: Severance, The Diplomat, The Pitt, Andor etj.
- Aktor/aktore në dramë: Diego Luna, Adam Scott, Bella Ramsey, Keri Russell etj.
- Komedia më e mirë: Hacks, Ghosts, Abbott Elementary, Nobody Wants This etj.
