Aktori Jeremy O. Harris është arrestuar në aeroportin e Naha-s në Japoni më 16 nëntor, pasi dyshohet se kishte tentuar të trafikonte drogë.
Sipas zyrtarëve të Doganës në Okinawa, të cilët folën për Reuters, në çantën e aktorit u gjetën 78 miligramë kristal që përmbante MDMA. 36-vjeçari, i njohur për rolin e Grégory Elliot Duprée në serialin “Emily in Paris”, ndodhet aktualisht në një qendër paraburgimi në Tomigusuku, Okinawa.
Zyrtarët e doganës kanë dorëzuar tashmë një kallëzim penal për nisjen e procedurave zyrtare të ndjekjes penale.
Dramaturgu dhe aktori është më i njohur për shfaqjen “Slave Play”, e cila theu rekord nominimesh në Tony Awards në vitin 2019. Ai ka bashkëprodhuar gjithashtu serialin “Euphoria” dhe ka bashkëshkruar skenarin e filmit “Zola”.
Vitin e kaluar, Page Six raportoi se Harris kishte themeluar një kompani të re produksioni, e cila debutoi me shfaqjen kontroverse “Prince F---t”, e vendosur në një të ardhme fiktive ku Princi George deklarohet hapur gay.
Përveç rolit në “Emily in Paris”, Harris ka pasur paraqitje të shkurtra në serialet “Gossip Girl” remake dhe “What We Do in the Shadows”.
