Gjyqi i shumëpërfolur mes Blake Lively dhe Justin Baldoni për akuzat e ngacmimit seksual është shtyrë me dy muaj. Sipas People, gjyqtari Lewis J. Liman vendosi të martën që seanca, e parashikuar fillimisht për 9 mars 2026, të zhvendoset në 18 maj për shkak të axhendës së tij të ngarkuar.
Gjatë seancës pas përfundimit të hetimeve, gjyqtari shpjegoi se ka dy procese penale të planifikuara, duke theksuar se “pavarësisht rëndësisë së këtij rasti… gjyqet penale kanë përparësi”.
Në dhjetor të vitit të kaluar, aktorja e “Gossip Girl”, 38 vjeç, paditi Baldoni-n duke e akuzuar për ngacmim seksual gjatë xhirimeve të filmit “It Ends With Us”. Aktori i “Jane the Virgin” i mohoi menjëherë akuzat.
Në janar, Baldoni, 41 vjeç, iu kundërpërgjigj me një padi 400 milionë dollarëshe kundër Lively-t, bashkëshortit të saj Ryan Reynolds dhe publicistes së tyre, duke i akuzuar për shpifje, shantazh dhe më shumë.
Megjithatë, në qershor, një gjykatës hodhi poshtë padinë e Baldoni-t për shpifje – si dhe padinë prej 250 milionë dollarësh kundër New York Times. Sipas vendimit, Baldoni dhe kompania e tij Wayfarer Studios “nuk kanë paraqitur prova se Lively ka bërë deklarata të tjera përveç atyre të paraqitura në ankesën e saj në Departamentin e të Drejtave Civile në Kaliforni, të cilat janë të mbrojtura nga ligji”.
Pavarësisht se iu dha mundësia të rishikonte padinë, Baldoni vendosi të mos e ndryshojë atë, duke bërë që gjyqtari të japë vendimin përfundimtar për ta hedhur poshtë.
