Kylie Jenner dhe Timothée Chalamet i kanë shuar më në fund zërat për krizë, teksa u shfaqën dorë për dore në premierën e filmit “Marty Supreme” në Los Angeles, të hënën mbrëma.
Çifti, i cili është në një lidhje prej më shumë se dy vitesh tërhoqi vëmendjen e të gjithëve në tapetin e kuq. Dyshja nuk hezituan të shfaqnin afeksion, ndërsa aktori i “Call Me By Your Name” e mbante Jenner të përqafuar gjatë gjithë kohës.
Që prej paraqitjes së parë publike në shtator 2023, gjatë turneut “Renaissance” të Beyoncé, dyshja është përballur shpesh me thashetheme për ndarje, për shkak të privatësisë që kanë mbajtur rreth lidhjes së tyre.
Edhe pse Jenner rrallë shfaqet në premierat e partnerit, burime pranë tyre thonë se ajo e mbështet atë në çdo hap.
Një burim i ka thënë më herët Page Six se Jenner shmangu red carpet-in e Golden Globes 2025 – pavarësisht se ishte e pranishme – sepse “nuk donte që nata të kthehej në histori rreth marrëdhënies së tyre”, pasi Chalamet ishte i nominuar për aktorin më të mirë për rolin në “A Complete Unknown”.
Burimi shton se “Kylie është shoqja më e mirë e Timothée-s dhe mbështetësja më e madhe e tij”, duke theksuar lidhjen e fortë mes tyre.
Gjatë pranverës çifti u shfaq disa herë në ndeshje basketbolli dhe tenisi, por më pas kaluan javë të tëra të ndarë për shkak të angazhimeve të shumta të Chalamet në xhirimet e projekteve të reja, përfshirë edhe “Dune”.
Megjithatë, ata u panë sërish së bashku në korrik në jug të Francës, më pas në tetor në Festivalin e Filmit në New York. Edhe pse aktori mungoi në 70-vjetorin e Kris Jenner në nëntor, burime kanë shpjeguar se ai ndodhej jashtë vendit për xhirime.
