Detaje të reja janë zbuluar rreth marrëveshjes financiare të divorcit mes Channing Tatum dhe Jenna Dewan, pas një beteje gjashtëvjeçare ligjore.
Sipas dokumenteve të reja të gjykatës, të depozituara më 26 nëntor, ish-çifti — Tatum, 45 vjeç, dhe Dewan, 44 — do të marrin 50% të pensioneve të njëri-tjetrit, por vetëm për përfitimet e fituara gjatë martesës së tyre 9-vjeçare (2009-2018).
Divorci u finalizua në shtator 2024. Dyshja ranë dakord për kujdestari të përbashkët të vajzës së tyre 12-vjeçare, Everly, si dhe të zgjidhin çdo mosmarrëveshje për mbështetjen e fëmijës në mënyrë private me një gjyqtar.
Dewan paraqiti kërkesën për divorc në vitin 2018 dhe që atëherë palët janë përballur në gjykatë mbi fitimet e “Magic Mike”, të cilat Tatum i pati gjatë martesës. Në dokumentet e gushtit 2024, Tatum akuzoi Dewan për “zvarritje të procedurave”, ndërsa avokatët e saj kundërpërgjigjën se ishte aktori ai që po “bllokonte” dokumente të rëndësishme të transaksioneve të filmit.
Sipas Dewan, çdo vonesë i jep Tatum-it mundësinë të përfitojë nga të ardhurat e filmit pa i dhënë asaj pjesën që i takon.
Në një intervistë për Variety në shtator, Tatum tha se marrëdhënia e tyre ka arritur një fazë paqeje:
“Jenna dhe unë jemi mirë tani, por ishte e dhimbshme ta shihje atë marrëdhënie të shkatërrohej.”
Ai pranoi se ishte veçanërisht e vështirë të ndahej koha me vajzën e tij. “Doja ta kisha me vete gjithë kohën,” u shpreh ai.
