Sean “Diddy” Combs, i cili po vuan një dënim prej 50 muajsh, ka reaguar ashpër ndaj dokumentariit të ri të Netflix, “Sean Combs: The Reckoning”, i prodhuar nga rivali i tij i vjetër, 50 Cent.
Përmes një deklarate për Variety, përfaqësuesi i tij e cilësoi projektin si “të turpshëm”, duke akuzuar platformën se ka përdorur “pamje të vjedhura” që nuk janë autorizuar kurrë për publikim.
Sipas palës së Combs, Netflix ka marrë materiale private — përfshirë edhe pjesë nga bisedat e tij me avokatët — duke i nxjerrë jashtë kontekstit për të “sensacionalizuar çdo minutë” të jetës së tij. Ata vënë në dukje se Combs ka mbledhur video personale që nga mosha 19 vjeçare për të treguar historinë e tij, dhe se asnjë e drejtë mbi këtë arkiv nuk i është transferuar Netflix-it apo palëve të treta.
Po ashtu, ekipi i tij kritikoi faktin që Netflix i dha kontroll krijues 50 Cent, të cilin e përshkruan si “një kundërshtar të përhershëm me një axhendë personale kundër Combs”. Sipas tyre, kjo zgjedhje është një tradhti personale, duke qenë se Combs ka pasur respekt të madh për CEO-n e Netflix, Ted Sarandos.
Nga ana tjetër, regjisorja Alexandria Stapleton deklaroi se materiali i përdorur “na ka ardhur në mënyrë të ligjshme” dhe se ekipi gjithashtu i është drejtuar disa herë avokatëve të Combs për komente, por nuk ka marrë përgjigje.
Netflix publikoi së fundmi trailerin zyrtar të dokumentarit me katër pjesë, i cili ofron pamje ekskluzive nga ditët e fundit të Combs para arrestimit të tij në shtator 2024 dhe nga momentet e tensionuara të telefonatave me ekipin ligjor.
Combs u dënua në korrik për dy akuza të transportimit për prostitucion, ndërsa u shpall i pafajshëm për akuzat më të rënda të trafikimit seksual me forcë, mashtrim. Ai pritet të lirohet në qershor 2028.
