Kombëtarja e Edoardo Rejas ka mbyllur përgatitjet për miqësoren me Katarin. Tekniku italian sigurisht që tashmë e ka të qartë mënyrën se si do të përballet me kundërshtarin. E megjithatë për ndeshjen e sotme, Reja e ka një dilemë, por që mund të përziejë kartat. Gjithcka lidhet me pozicionimin e Kristal Abazaj, nëse lojtari do të preferohet në mesfushë apo në sulm.
Në rastin e parë, Abazaj do të formojë sulmin me Xhixhën, duke i dhënë hapësirë një mesfushe kualitative. Kallaku, Herald Marku e Deliu janë emrat që japin garanci në mbulim dhe vertikalizim. Krahët janë të stabilizuar me Albion Markun e Hadrojin respektivisht në të djathtë e të majtë. E pandryshumeshme në të gjitha rastet prapavija me Sherrin mes shtyllave e të mbrojtur nga Gurishta, Bitri e Turkaj.
Cështja është se nëse Reja vendos ta përdorë Abazajn në mesfushë! Atëherë nga formacioni i sakrifikuari do të jetë Herald Marku i Vllaznisë. Ndërsa në krah të Xhixhës do të luajë qendërsulmuesi i Partizanit, Skuka. Kjo është një zgjedhje që italiani i pankinës do ta vendosë vetëm para miqësore në Marbella. Takimi me organizatorët e Botërorit 2022 do të luhet në orën 18.00 të së mërkurës. E për futbollistët e seleksionuar nga Superiorja është një mundësi për të treguar se mund të jenë të vlefshëm për kombëtaren, përtej një date jozyrtare të FIFA-s.
