Ndeshja e kampionatit elitar ukrainas mes Shakhtar Donetsk dhe Oleksandriya u ndërpre për rreth një orë, për të rifilluar e përfunduar më pas 2-2. Sipas raportimeve nga shtypi vendas fillimisht dhe më pas nga vetë Shakhtar në faqen zyrtare u mësua edhe arsyeja. Ndërprerja ndodhi për shkak të një sulmi ajror nga forcat ruse në qytetin e Lviv.
Kur ndeshja ishte në rezultatin 1-0 për Oleksandriya e mbeteshin edhe 5 minuta nga mbyllja e pjesës së parë, u dëgjuan sirenat e alarmit. Kështu, sipas rregullores të miratuar nga Federata ukrainase përpara startit të kampionatit, të dy skuadrat janë kthyer menjëherë në dhomat e zhveshjes. Pranë stadiumeve në Ukrainë ka gjithnjë një strehim ku futbollistët dhe stafet e tyre mund të futen në rast bomardimi.
Lexo më tej: Dyer të mbyllura e strehim në bunker nëse bie alarmi për bombardime: Ukraina rinis kampionatin
Kampionati ukrainas ka rifilluar me masa maksimale sigurie. Stadiumet janë të zbrazëta, sepse luhet me dyer të mbyllura për të mos rrezikuar njerëzit. Në këtë pikë, sistemi i alarmit aktivizohet në rrezikun më të vogël. Pasi pushuan sirenat e alarmit, ndeshja rifilloi përsëri dhe përfundoi me rezultatin 2-2. Miqtë kaluan në avantazh në minutën e 5' me Tsurikov, por zhvillimet kryesore erdhën pas rifillimit. Vetëm dy minuta pas një ore ndërprerje Mykhaylichenko barazoi rezultatin. Shakhtar mbeti me 10 lojtarë, pas kartonit të dytë të verdhë të Taylor në minutën e 56. Edhe me 10 lojtarë, Shakhtar gjeti avantazhin me Mudryk tetë minuta nga fundi. Por kur u mendua një fitore e tyre, Demchenko barazoi 2-2 në minutën e 86'.
