UEFA do të shpallë sot përjashtimin e Spartak Moskës nga Europa League për shkak të agresionit rus në Ukrainë. Lajmin e bujshëm e ka raportuar edicioni online i gjermanes Bild. Klubi rus duhet të ishte përballur në fazën e 1/8 me Leipzig (ndeshja e parë më 10 mars, kthimi më 17), me formacionin e Red Bull që në këtë pikë do të shkojë direkt në çerekfinale të eventit pa dalë në fushë.
Vendimi zyrtar është punë orësh, skuadra e drejtuar nga Paolo Vanoli (ish-lojtar i Serisë A midis Parmës, Fiorentinës dhe Bolonjës), i cili u ul në pankinën moskovite në mes të dhjetorit pas shkarkimit të Rui Vitorias, dhe ish-anësori i Interit, Victor Moses, duhet të përballej me Leipzig, por ky vendim i sheh gjermanët të kalojnë drejtpërdrejt në çerekfinale. Spartak Moska ishte skuadra e vetme ruse e mbetur në kompeticionin e Europa League.
