“Gjithçka të çon te krimi i organizuar”. Kështu nis një shkrim i gazetës italiane “La Repubblica” për atentatin ndaj një shqiptari paraditen e së dielës në plazhin e Torvaianica në afërsi të Romës. Një person i paidentifikuar qëlloi me 2 plumba Selvadi Shehajn, 38-vjeç në mes të plazhit të mbushur me njerëz.
Shqiptari ndodhet në gjendje të rëndë në spitalin San Camillo dhe sipas mjekëve me shumë gjasë do të mbetet i paralizuar. Dosjen e ka marrë tani në dorë anti-mafia italiane e Romës e koordinuar me zëvendësprokuroren Ilaria Calò. Hetuesit po përpiqen të zbulojnë motivet e atentatit.
Shehaj është bashkëshort i njërës prej pronareve të fabrikës “Bora Bora” me të cilën ka edhe një djalë 3 vjeç. Gruaja është marrë në pyetje, por nuk ka dhënë detaje për autorët apo motivet. Karabinierët kanë këqyrur kamerat e sigurisë në zonë, por nuk kanë gjetur shumë.
Pista më e mundshme është ajo e prishjes së pazareve të drogës. Shehaj u la në arrest shtëpiak 2 muaj më parë (iu gjetën 5 kg kanabis) pasi kishte vuajtur 2 vjet e gjysme burg. “La Repubblica” shkruan se anti-mafia e ka vënë re së fundmi një rritje të aktivitetit kriminal në këtë zonë.
Për këtë shkak edhe Prefekti i Romës ka ngritur një komitet për sigurinë që do të analizojë rritjen e kriminalitetit në zonë, përfshirë edhe atë shqiptar. Edhe anti-mafia thotë se vitet e fundit në zonë ka pasur denoncime të shumta për kërcënime që kishin marrë administratorë biznesesh në bregdet.
Hetimet janë shtrirë deri në vrasjen e ultrasve të Lacios një vit më parë që dyshohet se u ekzekutua nga shqiptarë të lidhur me grupe të Europës Lindore. ©LAPSI.al
LEXO EDHE: Mesazhi i fortë i Roberto Savianos: Roma po pushtohet nga mafia shqiptare
