Mbledhja e Këshillit Politik nuk prodhoi konsensus mes shumicës dhe opozitës për debatin lidhur me faktin se si vullneti i shqiptarëve do të përkthehet në mandate parlamentare, por edhe për mënyrën se si duhet të organizohen koalicionet para zgjedhjeve. PS i qëndron draftit që ka paraqitur, ndërsa PD-ja ka vendosur që të mos paraqesë asnjë draft, por të kërkojë asistencën e ODIHR-it, gjë që kundërshtohet nga socialistët që e shikojnë si lëvizje për të zvarritur procesin.
Përballë kësaj situate dhe faktit që Edi Rama nuk tërhiqet, opozita e bashkuar duket se po bën gati një plan B. Pas mbledhjes së Këshillit Politik, Lulzim Basha zhvilloi një takim me aleatët. Abc News që citon burime nga mbledhja raporton se opozita e bashkuar nuk do të heqë dorë nga insistimi për të kërkuar angazhimin e ndërkombëtarëve dhe se nuk do të paraqesë asnjë draft në Këshillin Politik për listat dhe koalicionet.
Por çfarë do të ndodhë nëse Edi Rama nuk pranon? Sipas të njëjtit burim, nëse do të prishet marrëveshja e 5 Qershorit në mënyrë të njëanshme nga Edi Rama, “keq do të shkojë për atë, se opozita do ta gjejë një mundësi. Ne i kemi gati variantet tona. Nëse vazhdon aventura do të ketë pasoja të rënda”.
