Kryeministri i Kosovës, Avdullah Hoti deklaroi se të hënën në Bruksel do të takohen me palën serbe për të dialoguar për marrëveshjen përfundimtare për njohje reciproke dhe normalizim të marrëdhënieve mes Kosovës dhe Serbisë. Hoti shkruan në Facebook se Kosova ka bekimin e Angela Merkel dhe Emmanuel Macron për të zgjidhur këtë çështje me Serbinë.
Lexo më tej: Hoti dhe Vuçiç nënshkruajnë marrëveshjen për normalizim ekonomik në SHBA
Sipas Hotit, do të ketë marrëveshje përfundimtare për njohje reciproke, dhe jo zgjidhje parciale. ©Lapsi.al
Reagimi
Bazuar në zotimet që i kemi dhënë në Samitin e Parisit më 10 korrik 2020, si dhe mbështetjen që kemi marrë nga Presidenti Makron dhe Kancelarja Merkel, të hënën në Bruksel e takojmë palën serbe për të dialoguar për marrëveshjen përfundimtare për njohje reciproke dhe normalizim të marrëdhënieve në mes të Kosovës dhe Serbisë.
Marrëveshja arrihet vetëm atëherë kur përmbyllet me njohje reciproke. Nuk do të ketë marrëveshje të ndërmjetme, parciale apo kreative që nuk e zgjidh problemin përgjithmonë. Do të ketë vetëm marrëveshje përfundimtare për njohje reciproke, që është sistematike dhe ku përfshihen të gjitha çështjet që duhet të adresohen në mes të dy vendeve të pavarura duke u bazuar në konventat, standardet dhe praktikën ndërkombëtare të rregullimit të marrëdhënieve në mes të dy vendeve të pavarura.
