Ministria për Europën dhe Punët e Jashtme të Shqipërisë njoftoi zyrtarisht para pak minutash se ambasadori shqiptar në Moskë u thirr në Ministrinë e Jashtme ruse, ku iu komunikua shpallja ‘non-grata’ e dy diplomatëve shqiptarë të akredituar në Rusi.
Në njoftimin e shpërndarë për mediat, ministria thekson se ky vendim i Rusisë pritej, dhe se dëbimi i dy zyrtarëve të ambasadës ruse në Tiranë katër ditë më parë erdhi pasi Shqipëria u bashkërendit me aleatët strategjikë në një reagim kolektiv për sulmin kimik të ish-agjentit rus në Britaninë e Madhe.
Deklaratë për Shtyp e MEPj:
Me datë 30 mars 2018, Ambasadori i Republikës së Shqipërisë në Moskë u thirr në Ministrinë e Punëve të Jashtme të Federatës Ruse. Gjatë takimit, Ambasadorit i’u komunikua shpallja “non – grata” e dy diplomatëve shqiptarë të akredituar në Federatën Ruse.
Reagimi i Moskës nuk përbën surprizë për ne. Vendimi i marrë prej nesh pak ditë më parë në lidhje me dy diplomatët Rusë, i bashkërenduar me qëndrimet e aleatëve tanë strategjikë ishte proporcional ndaj sulmit kimik në Salisbury. Theksojmë se kanalet tona diplomatike mbeten të hapura në funksion të marrëdhënieve konstruktive dypalëshe, paqes dhe sigurisë.
