Ndërprerja globale e shërbimeve të Microsoft ka prekur biznese, institucione dhe përdorues në vende të ndryshme të botës, përfshirë Kinën, Indinë, Japoninë dhe Singaporin. Kompania pranon se përpjekjet për rikthimin e shërbimeve nuk po ecin sipas pritshmërive, ndërsa Outlook dhe Teams vijojnë të shkaktojnë probleme.
Në Kinë, ku qasja në shumë platforma perëndimore është tashmë e kufizuar nga sistemi i censurës së internetit, ndërprerja ka krijuar vështirësi shtesë për kompanitë që komunikojnë me partnerë ndërkombëtarë.
Edhe në Japoni janë prekur disa sisteme të përbashkëta të teknologjisë së informacionit të qeverisë. Autoritetet bëjnë me dije se kanë aktivizuar mënyra alternative komunikimi, përfshirë telefonatat, mesazhet dhe platformat e tjera të komunikimit.
Në Indi, problemet kanë penguar komunikimin mes kompanive dhe klientëve, ndërsa disa institucione financiare kanë hasur vështirësi në zhvillimin e takimeve dhe marrjen e raporteve të rëndësishme.
Ndërkohë, autoritetet në Singapor konfirmuan se disa sisteme qeveritare janë prekur, por theksuan se shërbimet e emergjencës vijojnë të funksionojnë normalisht.
