Pesë ish-punonjës të Ministrisë të Drejtësisë, të shkarkuar nga detyra me urdhër të minsitres së re Etilda Gjonaj, kanë fituar betejën në Gjykatën Administrative.
Mësohet se Gjykata ka vendosur shfuqizimin e aktit të lirimit nga detyra dhe detyrimin e Ministrisë së Drejtësisë të rikthejë në pozicionin e mëparshëm shefin e inspektoriatit të profesioneve të lira, Arlind Arapin dhe katër zyrtarë të tjerë. Po ashtu, Gjykata Administrative detyron ministren Gjonaj t’ju japë pagat deri në rikthimin e tyre në detyrë.
Kështu, gjyqin e kanë fituar edhe ish-punonjësit Petrit Bakiu, Bledar Kabashi, Gerhard Xhafa dhe Valbona Kryemadhi.
Pesë ish-punonjësit e LSI shkuan bashkë dhe depozituan në gjykatë një padi për ministren. Ata e cilësuan vendimin e ministres Etilda Gjonaj si të padrejtë dhe kërkuan shfuqizimin e urdhrit për largimet e tyre nga puna.
Sipas ministres, nga kontrollet e kryera pas ankesave të qytetarëve, rezultoi se njerëzit e shkarkuar kishin kryer shkelje me ligjin dhe vonesa të tejskajshme në zgjidhjen e problemeve të popullatës. Por Gjykata Administrative vendosi sot të rrëzojë pretendimet e ministres, duke mbajtur anën e punonjësve të shkarkuar.
