NATO nuk do të zhvillojë samit në Shqipëri vitin e ardhshëm, pavarësisht planeve të mëparshme, deklaroi të enjten kryeministri shqiptar Edi Rama.
Reuters raportoi në qershor se planet për mbajtjen e një samiti të aleancës në Shqipëri vitin e ardhshëm ishin vënë në pikëpyetje për shkak të kundërshtimit nga administrata Trump dhe pakënaqësisë mes vendeve anëtare të NATO-s për shpenzimet e ulëta të Tiranës për mbrojtjen.
Duke folur në Dublin, përpara një takimi të udhëheqësve evropianë, Rama tha: “Çështja është se ende nuk ka një qëndrim të përbashkët se kur do të zhvillohet samiti; sigurisht jo në vitin 2027”.
Ai shtoi: “Dhe në vitin 2028, nëse do të ketë samit, ai do të jetë në Tiranë”.
NATO po shqyrton mundësinë e heqjes dorë nga praktika e viteve të fundit për të zhvilluar samite çdo vit, një hap që mund të shmangte një takim potencialisht të tensionuar me presidentin amerikan Donald Trump gjatë pjesës së mbetur të mandatit të tij.
Megjithatë, diplomatët thonë se aleanca mund të vendosë ende, me një afat të shkurtër përgatitjeje, të zhvillojë një samit në vitin 2026 — por jo në Tiranë.
Një zyrtar i NATO-s tha të enjten se “samiti i ardhshëm i NATO-s do të mbahet në Shqipëri. Vendimi për datën ende nuk është marrë”.
Në deklaratën e miratuar në samitin e NATO-s në Hagë, në qershor 2025, udhëheqësit e aleancës shkruanin: “Presim me kënaqësi takimin tonë të ardhshëm në Turqi në vitin 2026, të pasuar nga një takim në Shqipëri”.
Por në deklaratën e miratuar në samitin e aleancës në Ankara, në korrik të këtij viti, udhëheqësit u shprehën: “Presim me kënaqësi takimin tonë të ardhshëm”, pa përcaktuar kohën apo vendin e një samiti të ardhshëm./Reuters
