Mijëra qytetarë janë mbledhur në Tiranë në ditën e 21-të të protestës kundër qeverisë së kryeministrit Edi Rama. Tubimit i janë bashkuar edhe shqiptarë të ardhur nga diaspora, të cilët kanë udhëtuar nga vende të ndryshme për të mbështetur protestën.
Ashtu si në ditët e mëparshme, grumbullimi nisi në sheshin “Skënderbej” dhe vijoi më pas para Kryeministrisë, ku protestuesit mbajtën fjalime dhe përsëritën kërkesat e tyre. Në disa prej fjalimeve, kryeministrit Rama iu kërkua të japë dorëheqjen brenda ditëve në vijim.
Pas përfundimit të fjalimeve, protestuesit nisën marshimin përgjatë bulevardit dhe rreth godinës së Kryeministrisë, duke vijuar me thirrjet kundër qeverisë. Disa pjesëmarrës nga diaspora deklaruan se janë të gatshëm të qëndrojnë gjatë gjithë natës në shenjë proteste. Prania e emigrantëve në tubim është cilësuar nga organizatorët si një tregues se pakënaqësia e shprehur në protesta ka gjetur mbështetje edhe te shqiptarët që jetojnë jashtë vendit.
