Zendaya ka zbuluar se po planifikon të marrë një pushim nga karriera pas një viti tejet të ngarkuar profesionalisht.
Fituesja e çmimit Emmy pritet të ketë një 2026 të mbushur me projekte të mëdha filmike dhe televizive, përfshirë tituj si Dune: Part Three, Spider-Man: Brand New Day, The Odyssey dhe sezonin e tretë të serialit Euphoria. Pas këtij angazhimi intensiv, ajo ka lënë të kuptohet se do të tërhiqet përkohësisht nga skena.
“Pas kësaj, do të zhdukem për pak kohë. Do të më duhet të qëndroj disi larg,” është shprehur ajo në një intervistë të fundit, duke shtuar me humor se shpreson që publiku “të mos lodhet prej saj” pas gjithë këtyre projekteve.
Megjithatë, fansat nuk duhet të shqetësohen për një largim të gjatë, pasi Zendaya pritet të rikthehet në ekran në vitin 2027 me filmin Shrek 5, ku do të jetë pjesë e kastit së bashku me emra të njohur të Hollywood-it.
Deklaratat e saj vijnë në një kohë kur rrjetet sociale janë mbushur me thashetheme për një martesë të mundshme me partnerin e saj, aktorin britanik Tom Holland. Spekulimet u shtuan pasi ajo u pa me një unazë në dorë gjatë eventeve të fundit, si dhe nga qarkullimi i disa imazheve të krijuara me inteligjencë artificiale që pretendonin të tregonin ceremoninë e saj të dasmës.
Vetë Zendaya i hodhi poshtë këto pretendime, duke sqaruar se fotot janë të rreme dhe se kanë mashtruar shumë njerëz. Çifti, i cili konfirmoi publikisht lidhjen në vitin 2021, nuk ka bërë ende një deklaratë zyrtare lidhur me këto zëra.
