Gjyqi në Londër ndaj aktorit dhe komedianit britanik Russell Brand, i akuzuar për përdhunim dhe sulmeseksuale, është shtyrë nga mesi i qershorit për në muajin tetor.
50-vjeçari përballet me tre akuza për përdhunim, tre për sulm seksual dhe një për sulm të pahijshëm, ndërsa gjashtë gra pretendojnë se janë viktima të ngjarjeve të ndodhura mes viteve 1999 dhe 2009. Brand i ka mohuar të gjitha akuzat.
Gjyqi pritej të niste më 16 qershor në Southwark Crown Court, por gjatë një seance të mbajtur të hënën, gjyqtari Joel Bennathan vendosi që procesi të shtyhet dhe të fillojë më 12 tetor. Aktori nuk ishte i pranishëm në sallë, por u përfaqësua nga avokati i tij.
Gjatë seancës, gjykata bashkoi në një të vetëm të gjitha akuzat ndaj Brand, ndërsa u bë e ditur se procesi gjyqësor pritet të zgjasë më shumë se sa ishte parashikuar fillimisht – rreth dy muaj, nga pesë javë që ishte planifikuar më parë.
Hetimet ndaj tij nisën në shtator 2023, pas publikimeve investigative të emisionit Dispatches në Channel 4 dhe gazetës The Sunday Times. Raportimet përfshijnë akuza për marrëdhënie me një të mitur dhe pretendime për përdhunim në SHBA.
Çështja ndaj Brand mbetet në proces, ndërsa ai vijon të deklarohet i pafajshëm për të gjitha akuzat.
