Sophie Turner ka pësuar një “dëmtim të lehtë” gjatë xhirimeve të serialit të ri “Tomb Raider”, duke detyruar ndërprerjen e përkohshme të produksionit nga Amazon MGM Studios.
Sipas një deklarate zyrtare, xhirimet janë pezulluar përkohësisht ndërsa aktorja rikuperohet. “Presim të rifillojmë produksionin sa më shpejt të jetë e mundur,” tha një zëdhënës i studios.
Burime pranë produksionit bëjnë me dije se Turner pritet të rikthehet në sheshxhirim brenda dy javësh, ndërsa stafi do të vijojë punën me përgatitjet gjatë kësaj kohe.
Raportohet se aktorja kishte një problem të mëparshëm me shpinën, i cili është përkeqësuar për shkak të orareve intensive dhe skenave fizike kërkuese që nga fillimi i xhirimeve në janar. “Ajo është përkushtuar maksimalisht ndaj rolit, por intensiteti fizik i personazhit të Lara Croft e ka shtyrë trupin e saj përtej limiteve,” tha një burim.
Vetë Turner kishte treguar më herët se kishte zbuluar problemin kronik me shpinën gjatë përgatitjeve intensive për rolin. Ajo kishte ndjekur një regjim stërvitor prej tetë orësh në ditë, pesë ditë në javë, për disa muaj rresht.
Seriali i ri i “Tomb Raider”, i bazuar në videolojën e famshme, ndjek aventurat e arkeologes së njohur Lara Croft. Ky personazh është interpretuar më parë nga Angelina Jolie dhe Alicia Vikander në adaptimet filmike të viteve të kaluara.
Turner, e njohur për rolin e saj në serialin Game of Thrones, është parë së fundmi në xhirime në Mbretërinë e Bashkuar duke realizuar skena aksioni në rolin e ikonës së aventurës.
