Zhbllokohet pas shumë orësh aksi alternativ Maliq-Moglicë-Gramsh i cili u prezantua si rrugë alternative për Prrenjas-Librazhd. Rruga është e hapur në dy korsi dhe qarkullimi i është rikthyer normalitetit.
Qytetarët të cilët kanë udhëtuar drejt juglindjes janë përballur me rrugë të bllokuar dhe orë të tëra pritje në trafik. Një grua e bllokuar në trafik, ndërsa përpiqej të kthehej për në Tiranë, humbi ndjenjat pas një diskutimi me efektivët e policisë.
Krahas problematikave të shumta të vetë rrugës të ndërtuar vitet e fundit, kalimi i disa trajlerave paralizoi qarkullimin e automjeteve, duke shkaktuar radhë kilometrike. Autoriteti Rrugor Shqiptar njoftoi akset që mund të përdoren nga autoveturat dhe mjetet e tonazhit të rëndë, pas bllokimit të aksit Prrenjas-Librazhd.
Njoftimi:
Duke marrë shkas nga situata e rënduar e trafikut, si pasojë e bllokimit të aksit nacional Librazhd–Prrenjas (në vendin e quajtur “Arrat e Gurrës”), ARRSH, për t’i ardhur në ndihmë drejtuesve të mjeteve, sugjeron përdorimin e akseve alternative si më poshtë:
Për autoveturat:
✓ Maliq – Lozhan – Strelc – Gramsh – Elbasan
✓ Qafthanë – Pogradec – Korçë – Leskovik – Përmet – Tepelenë
Për mjetet e tonazhit të rëndë:
✓ Pika doganore Qafë Thanë – Maqedoni – Pika doganore e Bllatës – Rruga e Arbërit
Duke kërkuar mirëkuptimin e drejtuesve të mjeteve dhe të gjithë banorëve të zonës, ju lutemi të ndiqni me kujdes sinjalistikën rrugore si dhe udhëzimet e Policisë Rrugore.
