Bllokimi pa afat i aksit Librazhd–Prrenjas ka shkaktuar radhë kilometrike automjetesh, pasi rrëshqitjet e dherave rrezikojnë shembjen e urës në zonë. Kreu i ARRSH-së u ka bërë thirrje qytetarëve ta shmangin këtë segment për të mos mbetur të bllokuar, ndërsa zyrtarisht është rekomanduar përdorimi i itinerarit alternativ Maliq–Lozhan–Moglic–Gramsh–Elbasan deri në stabilizimin e situatës.
Por edhe aksi alternativ Maliq–Gramsh po përballet me dëmtime serioze. Në disa segmente janë shfaqur plasaritje të thella në trupin e rrugës, duke vështirësuar qarkullimin dhe duke rritur rrezikun për drejtuesit e mjeteve.
Kjo rrugë, që aktualisht mbetet lidhja e vetme e hapur mes juglindjes, Elbasanit dhe Tiranës, ka pasur probleme edhe më herët, por ditët e fundit amortizimi është përkeqësuar ndjeshëm, duke shtuar shqetësimet për sigurinë dhe lëvizjen në këtë zonë.
