Taylor Swift është parë duke u përlotur në dokumentarin e ri “End of an Era”, teksa rikujton momentet më të errëta të turneut të saj. Në episodin e parë, këngëtarja flet hapur për komplotin e parandaluar terrorist që e detyroi të anulonte tre koncertet e planifikuara në Vjenë në gusht 2024.
“Kurrë nuk e kisha imagjinuar që do të përballesha me një komplot terrorist,” thotë Swift në intervistën e realizuar në Londër, vetëm disa ditë para rikthimit në skenë. “Kemi kaluar disa situata të dhunshme dhe të frikshme gjatë këtij turneu. Ne i shpëtuam një masakre.”
Ngjarja e rëndë në Vjenë nuk ishte e vetmja që e tronditi këngëtaren. Swift u prek thellë edhe nga sulmi me thikë në Southport gjatë një feste me temë “Taylor Swift” në korrik 2024, ku tre vajza të reja humbën jetën dhe 10 persona u plagosën. Në dokumentar, ajo shpërthen në lot ndërsa flet për viktimat dhe tregon se kontaktoi familjet e tyre duke i ftuar në koncertet e saj në Londër.
Swift shpjegon se ndjente një presion të madh emocional para rikthimit në skenë, duke krahasuar rolin e saj me atë të një piloti avioni:
“Nëse tregoj frikë, edhe publiku do të trembet. Duhet të jem e qetë, pa marrë parasysh gjithçka që ndodh.”
Autoritetet austriake arrestuan dy persona për planifikimin e sulmit në Vjenë, dhe Swift thekson se anulimi i koncerteve ishte i domosdoshëm:
“Isha e shkatërruar, por falë autoriteteve po qanim koncertet – jo jetët.”
Ajo shton se heshti për disa javë pas ngjarjes, pasi çdo deklaratë publike mund të rrezikonte sigurinë e fansave:
“Ndonjëherë heshtja është vetëkontroll. Prioriteti im ishte që të përfundonim turneun europian të sigurt.”
