Pas gati dhjetë vitesh mungesë nga ekrani, Ariana Grande po rikthehet në televizion.
Artistja do të jetë pjesë e sezonit të 13-të të serialit të famshëm “American Horror Story”, i cili do të nisë transmetimin në Halloween 2026.
Lajmi u konfirmua ngaRyan Murphy Productions, përmes një videoje promovuese të publikuar në Instagram të premten. Në klip, dëgjohej fraza e famshme “Surprise, b–h! I bet you thought you’d seen the last of me”, një referencë ndaj personazhit të Emma Roberts në sezonin e tretë të serialit, “Coven”.
Grande do të luajë përkrah disa prej emrave më të mëdhenj të serialit, përfshirë Emma Roberts, Sarah Paulson, Evan Peters, Angela Bassett, Kathy Bates, Billie Lourd, Gabourey Sidibe, Leslie Grossman dhe Jessica Lange, e cila do të rikthehet pas mungesës që nga sezoni i tetë.
Fansat shpërthyen në entuziazëm në rrjetet sociale, duke komentuar me habi dhe gëzim për pjesëmarrjen e saj në projekt. “Ariana Grande?! Nuk po e besoj!”, shkroi një ndjekës, ndërsa një tjetër u lut që “Ariana të jetojë më shumë se një episod”, duke iu referuar zakoneve të serialit për vrasjet e shpeshta të personazheve.
Ky është roli i parë televiziv i Ariana Grandę që prej vitit 2015, kur ajo interpretoi Chanel #2 në serialin “Scream Queens”, gjithashtu i prodhuar nga Ryan Murphy. Ajo u bë e njohur për publikun si Cat Valentine në serialet e Nickelodeon “Victorious” (2010–2013) dhe “Sam & Cat” (2013–2014).
