Sia dhe ish bashkëshorti i saj, Dan Bernard, janë përfshirë në një betejë të ashpër ligjore për kujdestarinë e djalit të tyre njëvjeçar, Somersault.
Sipas dokumenteve të gjykatës të siguruara nga TMZ, Bernard — me profesion onkolog — ka kërkuar kujdestarinë e plotë të fëmijës, duke pretenduar se Sia përbën “rrezik serioz dhe të menjëhershëm” për të voglin.
“Sia është një nënë e papërshtatshme dhe e paqëndrueshme, që vuan nga varësia ndaj substancave narkotike, gjë që e bën të paaftë të kujdeset në mënyrë të sigurt për djalin tonë,” ka deklaruar ai para gjykatës. “Unë jam prindi i vetëm i qëndrueshëm dhe i besueshëm — jam mjek, i shëndetshëm dhe pa probleme me ligjin apo varësi.”
Këngëtarja 49-vjeçare, e cila në të kaluarën ka folur hapur për luftën e saj me varësinë, i ka mohuar kategorikisht akuzat, duke theksuar se prej më shumë se gjashtë muajsh është “e pastër dhe e kthjellët”.
“Përpjekja e Dan-it për të përdorur të kaluarën time kundër meje nuk ka asnjë qëllim të ligjshëm — është thjesht për të më diskredituar,” tha Sia në përgjigjen e saj ligjore.
Ajo gjithashtu ka hedhur akuza të rënda ndaj Bernardit, duke pretenduar se ai ka qenë nën hetim për posedim të materialeve të paligjshme për fëmijë, pas gjetjeve në kompjuterin e tij personal.
“Për këtë arsye, që prej gushtit, ne kishim rënë dakord që Dan të kishte vetëm takime të mbikëqyrura profesionalisht,” ka deklaruar këngëtarja në dokumentet e gjykatës.
